Даследаванні

Гэты цыкл прац прысвечаны таму, як беларуская дзяржаўная прапаганда канструюе сацыяльную і палітычную рэальнасць, якія стратэгічныя наратывы выкарыстоўвае і як прапагандысцкая камунікацыя ўплывае на грамадства, сацыяльныя сувязі і магчымасць публічнай размовы.

У розныя гады даследаваліся канспіралагічныя наратывы, механізмы дэгуманізацыі і палярызацыі, прапагандысцкае канструяванне знешніх пагроз, адрозненні паміж прапагандай, журналістыкай і стратэгічнымі камунікацыямі, а таксама пытанне пра тое, якой можа быць дзяржаўная камунікацыя ў дэмакратычнай Беларусі без узнаўлення прапагандысцкай мадэлі.

Даследаванні праводзіліся ў розных інстытуцыйных і партнёрскіх кантэкстах, у тым ліку ў супрацоўніцтве з Media IQ, Беларускай асацыяцыяй журналістаў і ў межах Belarusian Propaganda Watch.

Гэты цыкл прац прысвечаны таму, як гендарныя нормы і няроўнасці ствараюцца і ўзнаўляюцца праз медыя і публічную камунікацыю, як яны ўплываюць на бачнасць і прадстаўленне розных груп і як гендар звязаны з размеркаваннем улады і права на публічны голас.

Важнай часткай гэтай траекторыі стаў шматгадовы аналіз беларускіх медыя ў супрацоўніцтве з Media IQ: маніторынг гендарнай рэпрэзентацыі, стэрэатыпаў і гендарнай карэктнасці медыякантэнту. Паступова даследчы фокус пашырыўся ад медыярэпрэзентацыі да сувязі гендару з уладай, палітычнай камунікацыяй, прапагандай і сацыяльнымі інстытутамі.

Даследаванне прысвечана таму, як аўтарытарныя мадэлі ўзнаўляюцца праз інстытуцыйныя, адукацыйныя і камунікацыйныя практыкі беларускай школы і наколькі педагогі могуць ствараць альтэрнатыўныя мадэлі адносін і дзейнасці ва ўмовах аўтарытарна арганізаванай сістэмы.

У межах праекта Ірына Сідорская даследавала ролю і патэнцыял педагогаў у супраціве фармаванню і праявам аўтарытарных патэрнаў. Эмпірычную аснову гэтай часткі даследавання склалі восем глыбінных экспертных інтэрв’ю з беларускімі педагогамі. Аналіз паказаў, што магчымасці настаўнікаў структурна абмежаваныя інстытуцыйным асяроддзем, але нават у гэтых умовах могуць узнікаць “выспы свабоды” і альтэрнатыўныя практыкі ўзаемадзеяння.